KKground: [新聞] 流感高峰禁女出街黎姿偕夫撐枱腳買Cake 氹3千金

2014年2月12日星期三

[新聞] 流感高峰禁女出街黎姿偕夫撐枱腳買Cake 氹3千金

天氣時凍時暖，正值流感高峰期，個人好易病，做父母的更加變緊張大師。靚靚星媽黎姿（GiGi）育有三女，一對孖女出世時因只有三磅，抵抗力較弱，直至返Playgroup才開始出街。前年GiGi再誕下三女Pegella，現年17個月大的Pegella從未曝光，靚媽為怕孖女在外接觸細菌而傳染孻女，因而採取隔離政策，孖女和孻女分開湊，以策安全。日前，女神黎姿和丈夫馬廷強去中環星級餐廳SEVVA撐腳，愛女心切的靚媽歎完美食都不忘打包三大盒精美蛋糕畀三位愛女，蛋糕又紅又白，三位千金見到實好鍾意啦！

　　採訪 : 張詠森、陸旻昱

　　四十二歲的黎姿（Gigi），2008年宣佈息影、翌年就下嫁富商馬廷強後，極少曝光。2010年她為馬家生了一對孖女Pricia及Gianna，由於孖女出世時僅得三磅，出世後要足一個月氧氣箱，不過體格依然較弱，靚媽為怕孖女易受感染，據悉孖女一歲前盡量逗留家中與外界隔絕。直至孖女返Playgroup才開始出街，不過都係少出為妙。連親友探訪都限時限刻，結果孖女真係好少病痛，GiGi就沿用呢套「隔離政策」在孻女身上。不過近日正值流感高峰期，GiGi索性將孖女和幼女分開照顧，以免孻女被返學的姐姐感染到。就連農曆年，GiGi有親友上門拜年，都盡量少接觸幼女，以防萬一。

靚女含羞勁索

　　農曆年初七人日，下午一時左右，身穿黑衫皮褲、外加件應節紅色褸的黎姿就和丈夫撐腳食Lunch，二人揀選中環人氣餐廳SEVVA，該店由時裝界名人、Joyce Boutique創辦人郭志清胞妹郭志怡開設，以精美西餅聞名，是明星、闊太High Tea勝地。賭王上年92歲生日，四太梁安琪都特別在SEVVA訂造一個高達九呎九吋的蛋糕送給賭王。當日下午三時，黎姿夫婦食完午餐，本來連體步出太子大廈，但司機告知有記者後，黎姿老公先行步出，然後住14萬Hermes藍色Kelly bag高貴步出的她，一味低頭含羞答答，秀髮飄逸加上淡妝，靚媽身材好Fit、個樣又索，途人不禁駐足望幾眼。

　　聞情人節笑

　　記者向馬氏夫婦祝賀新年快樂，二人都禮貌笑一笑點頭示意，然後記者行近GiGi，問她情人節快到，會如何慶祝，手拎三大盒外賣出來的黎姿笑得特別甜，雖然無回應，但一直用手撥頭髮的她上車途中一直笑唔停，好幸福。記者見到索媽手拎的三個外賣盒，頭一盒係紅色和白色的Cake，睇怕隔離在家的三位千金，見到顏色鮮艷的精美Cake，一定好Like啦！