[新聞] 盛世仁傑現代考狀元 陳錦鴻穿崩封王

無綫幕後真易做，因為容忍到劇集甩甩漏漏都照出到街！講緊嘅咪係無綫套倉底劇《盛世仁傑》，2009年拍完，今個禮拜終於出籠。

套劇前晚播第三集，劇情講陳錦鴻演嘅宋庭玉考武狀元，其中一幕要考生騎馬射箭，陳錦鴻出場時，鏡頭左上方突然出現咗間類似學校嘅物體。而陳錦鴻之前嘅考生都有拍呢個鏡頭，但就唔見間學校，明顯有人唔記得執走間學校！不過陳錦鴻之前喺《萬凰之王》嘅一場戲都有支烏龍茶旁身，古裝劇出現現代嘅學校有幾奇？

多災多難

呢套劇原本係當年重頭劇，當時無綫諗住捧紅嗰時嘅吸金王廖碧兒，但因為要讓路畀另一套重頭古裝劇《宮心計》，就突然被抽起。之後《盛》劇賣咗畀海外，合約寫明半年內唔播得，直到近排，另一套新劇《飛虎》因cut咗涉及挾持人質劇情，由原來20集變成13集，無綫決定唔放喺周一至五晚播，改喺周六、日播，於是平日個期就由《盛》劇頂上。

(蘋果日報)