KKground... ......................... . 搜尋文章請按首頁左上角...................................................................................................@留言請按我@

2010年7月24日 星期六

[新聞] 大舞台:萬梓良返嚟啦!

無綫經典劇《流氓大亨》中,那場口水鼻涕危滴鄭裕玲臉的激動戲份;《他來自江湖》中跟周星馳一人一句「好嘢、失禮、佩服」; 80年代電視撈飯的集體回憶,又點少得萬梓良?當年萬子 hit爆電視台,過去逾 10年他扎根內地,久違的他近月發福回歸,接演今晚公演的舞台劇《魔鬼契約》過戲癮。他台上成魔;台下卻豪情已逝,於廣州營商、放假享天倫,心滿意足,歸於平淡。


已有 27年未曾演過話劇的萬梓良,長駐廣州十多年,近日他獲恩師鍾景輝鼓勵重返舞台,接演香港話劇團今晚開始公演的舞台劇《魔鬼契約》,飾演魔鬼默菲斯特一角。過去一個月,萬子日日朝十晚七打躉話劇團上環總部綵排,死背長達三個小時的對白,記走位記出場,冇 NG冇稿睇,咪話唔攞膽,難得他寶刀未老,記性好又擅於調節情緒,狂笑狂嚎激動含淚即嚟料,但綵排後馬上散功,累得兩眼通紅。萬子日前接受本報記者專訪時卻笑說:「開始排嘅時候有啲生疏,呢個係外國繙譯劇,唔可以講得太香港化,記劇本係基本功啫!」

未打算返無綫娘家



萬子選擇舞台回歸,暫時卻沒想過重返闊別 15年的 TVB娘家,他說:「冇咁嘅打算, TVB、有線、亞視或者港台,真係冇一個聯絡過我。隨緣啦,我喺內地已經過緊一個規律性生活,有家庭,又做咗唔同工作,賣吓服裝,搞吓生意仔,有兩餐,我覺得好滿足。拍劇太花時間,除非各方面可以互相配合。」80年代萬子於麗的、無綫兩台叱咤風雲, 90年代初轉攻影壇,中段突然跑去內地開拓男裝市場,開設個人品牌 Alexman,順勢將基地移去廣州,八年前他與空姐郭明黎結婚,誕下兒子萬大千。萬子假假哋都是金馬影帝,又曾是電視台一哥,經典作膾炙人口,要棄星途轉做生意佬 sell男裝談何容易,倒是他不以為然,他說:「冇問題,任何人都會消失。做落嚟嘅嘢能夠留畀人印象,慢慢亦都會淡。內地係另一個生活形式,證明畀自己知道唔需要做演員都可以搵兩餐,呢個最緊要,要靠做演戲先搵到收入,到自己年紀大咗會比較擔心,我o依家度過咗咯,今年都 53歲啦!」


憶血衣事件得啖笑


不過萬子直認從商非常難做,至於名氣是否有幫助,他坦言:「開始有少少,後尾越行越艱難,因為競爭大,做生意梗係要有龐大資金,我哋啲生意仔,能夠維持算幾好,我已經盡力啦。」內地應酬傾生意,不少人隊二窩頭杯杯清,萬子大笑:「嗰啲時間過咗啦,唔使啦,嗰時飲到三個頭呀,哈哈!」他在內地受訪時曾稱因受沙士影響,生意大上大落,最近則有指有人借他名聲沽名釣譽,他卻說:「冇所謂,點樣影響都唔會好大,可以方便人哋搵兩餐,何樂而不為?」從前萬子又急又激,人大了自然睇化,他說:「有好多事情急都急唔嚟,唔係一個人可以解決嘅。」當年他着血衣抗議無綫廠期不足,超級激,他回想舊事只輕鬆一笑:「得啖笑咪得啖笑囉,自己係做過咁嘅事,我都唔記得咗咯。」他話很淡,大多哈哈哈回答。他胖了,但精神不錯,兩個招牌酒窩全程招搖,笑容多,人生觀淡淡然,他笑說:「o依家我開心 o架!」


移居內地少看港劇


萬子在香港已沒有物業,今次返港也要住酒店。由於移居內地,他稱很少看港劇,對時下的小生花旦沒有留意,甚至對 TVB高層涉貪的消息也一無所知,他說:「我唔清楚,我少睇香港電視,自己成日走嚟走去。我又唔識上網,我網盲嚟 o架,連發訊息都唔識,拎起電話就聽:『喂,我是,好,就這樣。(普通話)』」


豪情舉動逐格睇

昔日的萬子在公在私都以激進及肉緊見稱,戲內戲外「經典作」堪稱空前絕後。


涕淚滴嘟嘟  86年
「 So what!」萬子在《流氓大亨》中的金句,劇中他對着昏迷的鄭裕玲(嘟嘟)痛哭七分鐘,眼淚鼻涕混成一體危滴嘟嘟臉,最後嘟嘟的眼角還流出一滴眼淚,經典!

水淋張鳳妮  89年
《他來自江湖》的其中一幕,萬子飾演的明天為教訓啪丸 wet妹張鳳妮,捉住她的頭髮入廁所開水兜頭淋,萬子七情上面爆青筋演出,張鳳妮真的被他搖到失魂。



血衣爭廠期  91年
萬子身穿以紅油寫着「乞求雞毛司令賜廠期」的血衣在清水灣電視城遊行,於化妝間神位前朗讀文天祥的《正氣歌》,原來他不滿拍《大家族》廠期不足,向監製抗議。



直播娶恬妞  92年
萬子和恬妞在清水灣電視城舉行婚禮,無綫現場直播。當時萬子向恬妞公開愛的宣言:「三個人一條命。」指他、恬妞及女兒三人同心同命,可惜婚姻只維持了四年。



拍劇過癮樂敍天倫


萬梓良在內地生活十分正常,但他很習慣,他說:「我屋企喺廣州,我夜晚 6點半前食飯, 11點瞓覺,唔知係咪年紀大咗,朝早 8點前起身,出差又鍾意坐早班飛機。今次做完呢個話劇後,短期內我都唔返嚟啦!」問萬子有否公餘活動?他哈哈笑說:「好似冇乜公餘,公眾假期就 family day。」戲癮難耐的時候,他偶然接拍內地劇,近年演過《阿郎在北京》、《花自飄零》、《潛龍行動》及《歲月驕陽》等。至於他的 8歲囝囝有否遺傳老竇的演藝 DNA?萬子則說:「冇,太細啦,細路仔等佢正正常常返學,佢o依家喺內地返學,我希望佢能夠喺一個爸爸媽媽、外公外婆,充滿愛嘅家庭長大,第時佢對邊方面有興趣,第時先算啦!」他又表明一個夠晒數:「自己年紀大,我好滿足啦。」


否認與恬妞復合


隨着萬子回歸,日前竟傳出他與前妻恬妞復合,他搖頭笑道:「太莫名其妙,我同太太非常好,呢啲係流言。」又有傳他婚姻及生意失敗才重出江湖,他同樣懶理,「嗰條方程式係咁諗 o架啦,全部假設係咁嘅,我覺得最緊要身體健康,前幾年我膽固醇高啲,要戒肥膩同有殼嘅海鮮,其他都 OK。」


提拔家棟眼光獨到
嘆發哥華仔早離巢

萬子 1977年入行,早年在麗的憑《大內群英》及《張三豐》系列等劇竄紅,入 TVB時已是大哥級人馬,當時其性格較火爆及情緒化。95年萬子拍攝在 TVB的最後一套劇《萬里長情》,由於他因工傷而撐枴杖開工,拍攝過程十分痛苦,所以他常嘆 TVB四兄弟各散東西,剩他一人撐到底,他曾慨嘆:「大哥周潤發、三弟劉德華同四弟周星馳都走晒,去晒拍電影,剩番我一個喺電視台,我點都要撐住!」幕後同事因而封四人是 TVB四大天王。今時今日,問萬子對這段回憶有沒有印象,他一味哈哈笑:「唔係、唔係,邊係四大天王吖!講真都十幾年啦,我要做好自己新嘅工作先得 o架!」提起《萬里長情》,不得不提造就了一段師徒緣,當年有份演出的林家棟名不經傳,一天萬子帶着他走進化妝間,向在場記者大力推介:「你哋唔使影我,影吓呢個,佢叫林家棟,o依家仲捱緊騾仔,佢得 o架,好勤力,你哋多啲寫吓佢啦。」家棟怕醜面紅,萬子卻搭着他膊頭合照,哎吔師徒自此一照定情,後來家棟憑《茶是故鄉濃》晉升一線小生,證明萬子有眼光。


(頻果日報)
http://bbs.ent.163.com/bbs/tvb/182976765.html

沒有留言:

張貼留言